ثقافة

رحلة بلا عودة ….للشاعر مجدي محمود

قولي يا ضنايا وحبيب العين
بعتوك للموت في رحله
ولا انتا اللي كنت طاير م الفرحه
مستعجل اوي يا واد
يمكن فاكر نفسك ها تقابل زويل
ولا مجدي يعقوب
دا انتا متخرج من شهر يدوب
بلاش تسافر
انا قلبي ماعدش يتحمل
سنين الغربه والشقا
برواز شهادتك لسه ما تعلقش علي صدري
مش كنت يا واد شوفتلك عروسه
اهي الفرحه راحت معاك بدري
لا دكتور ليه تمن ولا حتي العاطل
ها تفرق ايه مع اللي في قلبه حجر
ماهو قلبي انا اللي اتوجع
انا اللي تعبت وربيت
وانا اللي سهرت وشقيت
كل الناس خدت اتعابها منك
الا انا
امك.. اللي رافعه اديها للسما
بتشكي الظلم والفساد
والقهر لرب العباد

كنت قولي انك مش راجع
اقول ايه لابوك
اقوله انهم دفنوك
من غير حتي اخواتك ما يودعوك
انا ها اخبي الخبر حتي عن نفسي
واعمل روحي مش شايفه
واقول للناس حبيبي راجع
دا واعدني وفي قلبه رحمه
وفي ايده بلسم
وقال ما تخافيش
انا انسان
بس انتي ادعيلي
واصبري
امر الله
وقد كان
#رحم الله شهدائنا والهم ذويهم الصبر في الحادث المؤلم لاطباء المنيا وسمالوط #

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى