الحرة فنأخبارالكلمة الحرة لايتالمرأةالمواهب الأدبيةثقافة
أخر الأخبار

روايه الكاتبةالكبيرة/ هدي عبدالمقصود(1_حدث بالفعل)

8 / 100

بـقلم / هـدي عبد المقصود

حدث بالفعل (1)

(مطلوب آنسة للعمل تجيد التعامل مع المسنين يفضل مؤهل عالي مناسب كما يشترط الخبرة في مجال معاملة المسنين)
العنوان دار ال….. لرعاية المسنين

ده اعلان عن وظيفه على موقع اوليكس للوظائف وطبعا في ناس كتير هتركز معاه وخصوصا اللي معاهم مؤهل يتفق مع طبيعة العمل.

زيي انا..
ولكن للاسف لما روحت الدار كنت زي اللي اجتاز بوابه من بوابات العذاب ومقدرتش اخرج منها لحد انهارده
مش هقدر اقول اسم الدار لاسباب هتعرفوها بعدين

انا ندى وقت ما قريت الاعلان كان عندي ٣٠ سنه

وكنت بدور على شغل لما قريت الاعلان ده ولقيتهم كاتبين
للاستعلام برجاء الاتصال على
رقم


فرحت اوي لاني بحب المسنين واحب اتعامل معاهم بحس بحنان غريب ناحيتهم.
اتصلت وحددولي مقابله مع مدير الدار. لما وصلت قابلني المدير وقالي
مدام ندى احنا اهم حاجه عندنا الالتزام. مواعيد الحضور والانصراف مقدسه ولو هتضطري للغياب لازم تبلغينا قبلها بيوم. الاجازه يوم الجمعه بس.
وياريت تجيبي شنطة هدوم معاكي تحسبا لاي ظروف وهيكون ليكي اوضه في الدار تستعمليها خلال اليوم. واكيد انت مدركه ان مطلوب منك الاهتمام بالمسنين باقصى درجه. راحة المسن وتلبية طلباته هما هدفنا الاساسي.

قلتله ماتقلقش ان شاء الله اكون عند حسن ظن حضرتك..

ابتديت اتعرف على الدار وكان موجود ٤ غرف كبار.
واحده للمسنين اللي تحت السبعين
وواحده للي فوق السبعين وصحتهم كويسه
وواحده للي عندهم امراض خطيره ولكن يقدروا يخدموا نفسهم
وواحده للمسنين اللي بيحتاجوا خدمه خاصه جدا.
كنت متحمسه جدا للشغل وابتديت اتعرف على المسنين معظمهم كانوا ناس طيببن.
وقابلت شاكر لاول مره. شاكر كان الممرض المسؤول عن خدمة المسنين الرجال. نسيت اقول لكم ان كان فيه اربع غرف تانيين للرجال بنفس التقسيمه.
على فكره كل الغرف كانوا في الدور الاول. والدور الثاني كان فيه المطابخ والعيادات.ولما شفت سلم نازل من الدور الاول وعليه باب حديد. سألت ايه ده؟
شاكر قالي ان في دور أرضيّ. بيشيلوا فيه الكراكيب. للحظه استغربت. وليه ميتروقش ويبقى فيه المطابخ والعيادات ويستغلوا الدور الثاني لعمل غرف خاصه. لان اول يوم وانا بقدم سمعت استاذ مرعي المدير وهو بيكلم حد في التليفون وبيعتذر لعدم وجود غرف خاصه بالدار…
انا استلمت شغلي يوم السبت والاسبوع مر من غير اي احداث غريبه خالص لحد ما يوم الخميس كنت باخد هدومي اللي اتبهدلت وانا بتعامل مع مسني الدار علشان اغسلها وارجعها معايا يوم السبت زي ما انا متعوده. كانت الساعه حوالي سبعه بليل. خلصت تجهيز هدومي ومسكت الموبيل علشان ارن على شاكر اشوفه فين وابلغه اني همشي ساعه بدري لو ينفع.
لكن لاقيت رساله عالواتس منه بتقول ..
ماتمشيش واعمليلنا اتنين شاي انا. هجيلك علشان ابلغك تعليمات استاذ مرعي الجديده واقعد معاكي شويه رديت وقلتله ماشي
سبت الموبايل عالكرسي وقمت اخدت شنطتي ورحت عالمطبخ وقلت نشرب الشاي فالمطبخ ونمشي من
بره بره وجيه شاكر وقعدنا شربنا الشاي ومشينا من الدار انا وهو.
لاننا بنركب ميكروباص للرمايه مع بعض وهناك هو بيركب من ناحيه وانا من الناحية التانيه.
الساعه.كانت بقت عشره وابتدت الدنيا تهدى خصوصا اننا في الشتاء
شاكر وانا بركب قالي ابقي رنيلي لما توصلي
قلتله حاضر…
وروحت واول حاجه عملتها دخلت الحمام اخد شاور. فجأه نور الشقه كله اتقطع…
محطتش فدماغي وكملت الشاور بتاعي لكن كل لما اغمض عيني عشان الصابون اشوف مشهد غريب اوي وانا مغمضه ..
المشهد كان عباره عن وش مرعب بيبصلي وبيعد على صوابعه لحد اربعه.
فتحت عيني وانا مرعوبه لقيت سوااااااد وفي وسط السواد لمحت كأن رؤؤس بني ادمين. الغريبه اني عارفه الناس ديه. دول كانهم مجموعه من مسني الدار. لأ مش كأنهم انا عارفه الوجوه ديه فعلا.
على اد ما اترعبت من شكلهم عاى اد ما خفت اغمض عيني تاني لاشوف نفس الوش المرعب.
في نفس اللحظه حسيت بحركه ورايا
بصيت…..
وياريتني ما بصيت لاني لقيت نفس الوش ورايا وكانه متعلق في الهوا ومرفوع جنبه كفين فارد صوابع كف منهم وبيعد عليه.
مسكت نفسي بالعافيه علشان مصوتش كنت خايفه اوي اتلبس بس هتلبس ايه و هشوف ايه اكتر من اللي انا شايفاه دلوقتي …
اخدت الروب ولبسته وطلعت اجري عالاوضه. اول ما طلعت على السرير لقيت النور جيه ضغطت بايدي على صدري جامد بحاول امنعه من الارتجاف.
وفي نفس الوقت دماغي شغاله بحاول استوعب اللي انا شفته.
في عز خوفي حسيت اني شفت الوش ده قبل كده. شفته بكل ملامح الرعب اللي فيه. وشفته وهو مش مرعب اوي كده.
للحظه افتكرت اني كنت لسه بقرا سلسلة مقالات عن الحملات الصليبيه. وتقريبا شفت الوش ده في مقال منهم. بسرعه فتحت الفيس بوك ورجعت للمقالات ولقيت فعلا صوره مرفقه مع مقال منهم وكانت شبه الوش اللي انا شفته جدا. رجعت اقرا المقاله تاني. ولقيتها بتتكلم عن مجموعه من فرسان الهيكل اللي تم اعدامهم بأمر مباشر من الملك فيليب الرابع ملك فرنسا بعد عودتهم من الشرق اثناء الحروب الصليبيه حيث اتهمتهم الكنيسه بالوثنيه واهانة الصليب وعبادة الشيطان #بافومييت
يا ترى ايه علاقة شيطان من القرن الحادي عشر بدار المسنين اللي انا بشتغل فيها. ده اللي هنعرفه الحلقه الجايه…

تبعونا .. خاص للكلمة الحرة نيوز

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
آخر الأخبار